ರಾಜ್ಯದಲ್ಲಿ ಭೂ ವ್ಯಾಜ್ಯಗಳಿಗೆ ಕಡಿವಾಣ ಹಾಕಲು ಮತ್ತು ಕಂದಾಯ ವ್ಯವಸ್ಥೆಯನ್ನು ಮತ್ತಷ್ಟು ಪಾರದರ್ಶಕಗೊಳಿಸಲು ಕರ್ನಾಟಕ ಕಂದಾಯ ಇಲಾಖೆಯು ಅತ್ಯಾಧುನಿಕ ತಂತ್ರಜ್ಞಾನ ಆಧಾರಿತ ನವೀಕೃತ ಮಾದರಿಯ ಆರ್‌ಟಿಸಿ (ಫಾರ್ಮ್ 16-ಎ) ವಿತರಣೆಗೆ ಮುಂದಾಗಿದೆ. ರಾಜ್ಯ ಸರ್ಕಾರದ ಭೂಮಿ ಆನ್‌ಲೈನ್ ತಂತ್ರಾಂಶದ ಅಡಿಯಲ್ಲಿ ಈ ಹೊಸ ಮಾದರಿಯ ಪಹಣಿಗಳು ಸಾರ್ವಜನಿಕರಿಗೆ ಕೆಲವೇ ದಿನದಲ್ಲಿ ಲಭ್ಯವಾಗಲಿದ್ದು, ನಕಲಿ ದಾಖಲೆಗಳ ಹಾವಳಿಗೆ ಸಂಪೂರ್ಣ ತಡೆ ಬೀಳಲಿದೆ.
ಹೊಸ ಆರ್‌ಟಿಸಿಯಲ್ಲಿ ಪ್ರಮುಖ ಬದಲಾವಣೆಗಳು :
14 ಅಂಕಿಯ 'ಯುಎಲ್‌ಪಿಐಎನ್' (ULPIN) ಪ್ರತಿಯೊಂದು ಜಮೀನಿನ ತುಂಡಿಗೂ ಆಧಾರ್ ಮಾದರಿಯಲ್ಲಿ 14 ಸಂಖ್ಯೆಗಳ 'ವಿಶಿಷ್ಟ ಭೂ ಗುರುತಿನ ಸಂಖ್ಯೆ' (Unique Land Parcel Identification Number) ಹಾಗೂ ಓಪನ್ ಲೊಕೇಶನ್ ಕೋಡ್ ನೀಡಲಾಗುತ್ತದೆ. ಆಧಾರ್ ಹಾಗೂ ರೈತ ಐಡಿ ಲಿಂಕ್: ಮಾಲೀಕರ ಗೌಪ್ಯತೆಯನ್ನು ಕಾಯ್ದುಕೊಂಡು ಆಧಾರ್ ಸಂಖ್ಯೆಯನ್ನು ಹಾಗೂ ವಿಶಿಷ್ಟ 'ರೈತ ಐಡಿ'ಯನ್ನು ಆರ್‌ಟಿಸಿಯಲ್ಲಿ ಮುದ್ರಿಸಲಾಗುತ್ತದೆ.
ಆರ್‌ಟಿಸಿಯಲ್ಲೇ 'ಭೂ ನಕ್ಷೆ': ಜಮೀನಿನ ಭೌಗೋಳಿಕ ಗಡಿ ಗುರುತಿಸುವ ಜಿಯೋ-ರೆಫರೆನ್ಸ್ಡ್ ಸರ್ವೇ ಸ್ಕೆಚ್ ಅನ್ನು ಆರ್‌ಟಿಸಿ ಪ್ರತಿಯ ಮೇಲೆಯೇ ಅಳವಡಿಸಲಾಗಿರುತ್ತದೆ. ದಾಖಲೆಯ ನಕಲಿಕರಣ ತಡೆಯಲು ಪ್ರತಿಯೊಂದು ಆರ್‌ಟಿಸಿಗೂ ಪ್ರತ್ಯೇಕ ಸ್ಕ್ಯಾನ್ ಮಾಡಬಹುದಾದ ಡೈನಾಮಿಕ್ ಕ್ಯೂಆರ್ ಕೋಡ್ ಇರಲಿದೆ.
ಈ ಮಾದರಿಯ ಆರ್ ಟಿ ಸಿ ವಿತರಣೆಯಿಂದ ಏನೆಲ್ಲಾ ಲಾಭ ?
* ನಕ್ಷೆ, ಆಧಾರ್ ಹಾಗೂ ಕ್ಯೂಆರ್ ಕೋಡ್ ಜೋಡಣೆಯಿಂದಾಗಿ ನಕಲಿ ಆರ್‌ಟಿಸಿ ಸೃಷ್ಟಿಸಿ ಜಮೀನು ಹೂಡಿಕೆದಾರರನ್ನು ಅಥವಾ ರೈತರನ್ನು ವಂಚಿಸುವುದನ್ನು ತಡೆಯಬಹುದು.
* ಮೊಬೈಲ್ ಮೂಲಕ ಕ್ಯೂಆರ್ ಕೋಡ್ ಸ್ಕ್ಯಾನ್ ಮಾಡಿ, ಜಮೀನಿನ ನೈಜ ಮಾಲೀಕರು ಯಾರು ಎಂಬುದನ್ನು ಕ್ಷಣಾರ್ಧದಲ್ಲಿ ಧೃಡೀಕರಿಸಿಕೊಳ್ಳಬಹುದು.
* ಜಮೀನಿನ ಮೇಲಿರುವ ಸಾಲದ ಹೊಣೆಗಾರಿಕೆ, ಎ/ಬಿ ಖರಾಬು ವಿವರಗಳು ಹಾಗೂ ನ್ಯಾಯಾಲಯದ ಮೊಕದ್ದಮೆಗಳ ಮಾಹಿತಿ ಸ್ಪಷ್ಟವಾಗಿ ಲಭ್ಯವಾಗುವುದರಿಂದ ಬ್ಯಾಂಕ್ ಸಾಲ ಪಡೆಯಲು ಮತ್ತು ಆಸ್ತಿ ನೋಂದಣಿಗೆ ಅನುಕೂಲವಾಗಲಿದೆ.
ಕಂದಾಯ ಇಲಾಖೆಯು ಈ ಪ್ರಕ್ರಿಯೆಯನ್ನು ಅಧಿಕೃತವಾಗಿ ಅನಾವರಣಗೊಳಿಸಿದ್ದು, ರಾಜ್ಯಾದ್ಯಂತ ಹಂತ ಹಂತವಾಗಿ ಸಾರ್ವಜನಿಕರ ಬಳಕೆಗೆ ಮುಕ್ತಗೊಳಿಸುತ್ತಿದೆ. 'ಭೂಮಿ' ಪೋರ್ಟಲ್ ಮೂಲಕವೇ ಹೊಸ ಮಾದರಿಯ ಆರ್‌ಟಿಸಿಗಳನ್ನು ಮುಂದಿನ ಕೆಲವುದಿನಗಳಲ್ಲಿ ಅಥವಾ ಕೆಲವು ತಿಂಗಳುಗಳಲ್ಲಿ ಸಾರ್ವಜನಿಕರು ಪಡೆದುಕೊಳ್ಳಬಹುದಾಗಿದೆ.
ಕರ್ನಾಟಕದ ಪಹಣಿಯಲ್ಲಿ ಮಹತ್ವದ ಬದಲಾವಣೆಗೆ ಸಿದ್ಧತೆ :
ಕರ್ನಾಟಕದ ರೈತರ ಪಹಣಿ (RTC)ಯಲ್ಲಿ ಮಾಲೀಕರ ಫೋಟೋ, ವಿಳಾಸ, ಆಧಾರ್, FRUITS ID ಮತ್ತು QR ಕೋಡ್ ಸೇರಿದಂತೆ ಹಲವು ಮಾಹಿತಿಗಳನ್ನು ಸೇರ್ಪಡೆಗೊಳಿಸುವ ಉದ್ದೇಶವಿದೆ. ಪಹಣಿ ಹಾಗೂ ಭೂನಕ್ಷೆಯ ಮಾಹಿತಿಯನ್ನು ಹೊಂದಾಣಿಕೆ ಮಾಡುವುದರಿಂದ ದಾಖಲೆ ಪರಿಶೀಲನೆ ಸುಲಭವಾಗುವ ನಿರೀಕ್ಷೆಯಿದ್ದು, ಮುಂದಿನ 3–4 ತಿಂಗಳಲ್ಲಿ 25 ಲಕ್ಷ ನವೀಕೃತ ಪಹಣಿಗಳನ್ನು ವಿತರಿಸುವ ಗುರಿ ಹೊಂದಲಾಗಿದೆ.
ಈ ಬದಲಾವಣೆಗಳಿಂದ ನಕಲಿ ದಾಖಲೆಗಳನ್ನು ಪತ್ತೆಹಚ್ಚಲು, ಭೂಮಿಯ ವಿಸ್ತೀರ್ಣದಲ್ಲಿನ ವ್ಯತ್ಯಾಸಗಳನ್ನು ಗುರುತಿಸಲು ಮತ್ತು ರೈತರ ಮಾಹಿತಿಯನ್ನು ಪರಿಶೀಲಿಸಲು ನೆರವಾಗಬಹುದು. ರೈತರು ತಮ್ಮ ಪಹಣಿಯಲ್ಲಿನ ಹೆಸರು, ಸರ್ವೆ ನಂಬರ್‌, ವಿಸ್ತೀರ್ಣ ಹಾಗೂ FRUITS ID ವಿವರಗಳನ್ನು ಪರಿಶೀಲಿಸಿಕೊಳ್ಳುವುದು ಸೂಕ್ತ. ಈಗಿನ ಆರ್ ಟಿ ಸಿ ಮತ್ತು ಮುಂದಿನ ಆರ್ ಟಿಸಿ ಬಂದನಂತರದಲ್ಲಿ ಎರಡನ್ನೂ ಪರಿಶೀಲಿಸಿಕೊಳ್ಳಿ.
As an Amazon Associate I earn from qualifying purchases.