ಸದರಿ ಸ್ಥಳದಲ್ಲಿ ಅಂಗಡಿ ಮುಂಗಟ್ಟುಗಳಿದ್ದು ದಿನನಿತ್ಯ ವ್ಯಾಪಾರ ವಹಿವಾಟು ನಡೆಸುತ್ತಿದ್ದಾರೆ. ಆ ಅಂಗಡಿಗಳಿಗೆ ತೆರಳಲು ಮತ್ತು ಅಲ್ಲಿಗೆ ಬರುವವರಿಗೆ ವಾಹನ ನಿಲ್ಲಿಸಲು ಮತ್ತು ರಸ್ತೆಯಲ್ಲಿ ಸಾರ್ವಜನಿಕರ ಸಂಚಾರಕ್ಕೆ ಮತ್ತು ವಾಹನ ಸಂಚಾರಕ್ಕೆ ಅಡಚಣೆಯುಂಟಾಗುತ್ತಿದೆ. ಸಂತೆಯ ದಿನ ಅಂಗಡಿ ತೆರೆಯುವ ಈ ವ್ಯಾಪಾರಿಗಳು ತಮ್ಮ ಅಂಗಡಿ ಸಮೀಪ ಯಾವುದಾದರೂ ವಾಹನ ಓಡಾಡಿದರೆ ಅವರೊಂದಿಗೆ ವಾಗ್ವಾದಕ್ಕಿಳಿಯುವ ಮೂಲಕ ಪ್ರತಿವಾರ ಒಂದಿಲ್ಲೊಂದು ಜಗಳ ನಡೆಯುತ್ತಿರುತ್ತಿದೆ. ಅನೇಕ ಸಾರ್ವಜನಿಕರು ಪೋಲೀಸರು ಮತ್ತು ಪಟ್ಟಣ ಪಂಚಾಯಿತಿಗೆ ಮೌಖಿಕವಾಗಿ ತಿಳಿಸಿದರೂ ಯಾವುದೇ ಪ್ರಯೋಜನವಾಗಿಲ್ಲವೆಂದು ಅಸಮಾಧಾನ ಹೊರಹಾಕುತ್ತಿದ್ದಾರೆ.
ಬಿಎನ್‌ಎಸ್ ಕಾಯಿದೆ 285ರ ಸ್ಪಷ್ಟ ಉಲ್ಲಂಘನೆಯಾಗಿದ್ದರೂ ಪೋಲೀಸರ ಮೌನ.
ಯಾವುದೇ ವ್ಯಕ್ತಿಯ ಕೃತ್ಯದಿಂದ ಸಾರ್ವಜನಿಕ ರಸ್ತೆಯಲ್ಲಿ ಇತರರಿಗೆ ಅಡಚಣೆ, ಅಪಾಯ ಅಥವಾ ತೊಂದರೆ ಉಂಟಾದರೆ ಭಾರತೀಯ ನ್ಯಾಯ ಸಂಹಿತಿಯ 285ರ ಉಲ್ಲೇಖದಂತೆ ಯಾವುದೇ ವಾರೆಂಟ್ ರಹಿತವಾಗಿ ದಸ್ತಗಿರಿ ಮಾಡಿ ತನಿಖೆ ನಡೆಸುವ ಅಧಿಕಾರವನ್ನು ಈ ಕಾಯಿದೆ ನೀಡಿದೆ. ಹಾಗೂ ಸಾರ್ವಜನಿಕರಿಗೆ ಉಪದ್ರವಾಗುತ್ತಿರುವ ಹಿನ್ನಲೆಯಲ್ಲಿ ೨೦೨೩ರ ಭಾರತೀಯ ನಾಗರೀಕ ಸುರಕ್ಷಾ ಸಂಹಿತೆ ೧೫೨ರಂತೆ ಕ್ರಮಕೈಕೊಳ್ಳಬೇಕಾಗುತ್ತದೆ. ಆದರೂ ವರ್ಷಗಟ್ಟಲೆಯಿಂದ ಈ ವ್ಯಾಪಾರಿಗಳಿಂದ ತೊಂದರೆ ಆಗುತ್ತಿದ್ದರೂ ಪೋಲೀಸರು ಯಾವುದೇ ಕ್ರಮ ಕೈಗೊಳ್ಳದಿರುವುದರ ಬಗ್ಗೆ ಸಾರ್ವಜನಿಕರು ಅಸಮಾಧಾನ ಹೊರಹಾಕುತ್ತಿದ್ದಾರೆ.
ಜವಾಬ್ದಾರಿ ಮರೆತ ಪಟ್ಟಣ ಪಂಚಾಯಿತಿ
ಸಂತೆ ಮೈದಾನದಲ್ಲಿ ಕನಿಷ್ಟ ಮೂಲಭೂತ ಸೌಕರ್ಯ ಒದಗಿಸಿ ವ್ಯಾಪಾರಕ್ಕೆ ಅವಕಾಶ ಕಲ್ಪಿಸಿರುವುದರಿಂದ ಅಲ್ಲಿ ವ್ಯಾಪಾರ ಮಾಡುವವರಿಂದ ಪಟ್ಟಣ ಪಂಚಾಯಿತಿ ಕನಿಷ್ಟ ಆದಾಯ ನಿಗದಿಪಡಿಸಿಕೊಳ್ಳಬಹುದು. ಪಟ್ಟಣ ಪಂಚಾಯಿತಿಗೆ ನಿಗದಿತ ಆದಾಯ ಕೊಡುವವರಿಗೂ ಸಂತೆಯದಿನ ಸಂತೆ ಪ್ರದೇಶದ ಹೊರಗೆ ವ್ಯಾಪಾರ ಮಾಡುವುದರಿಂದ ನಷ್ಟವಾಗುತ್ತದೆ. ಸಾರ್ವಜನಿಕರಿಗೂ ತೊಂದರೆಯಾಗುತ್ತಿದೆ. ಕರ್ನಾಟಕ ಮುನ್ಸಿಪಲ್ ಕಾಯಿದೆ 1964ರ ನಿಯಮ 216(೨)ರಂತೆ ಸಾರ್ವಜನಿಕರಿಗೆ ತಡೆಯುಂಟಾಗುವುದರಿಂದ ಇದನ್ನು ತೆರವುಗೊಳಿಸುವ ಅಧಿಕಾರ ನೀಡಿದ್ದರೂ ಜನರ ಮತ್ತು ವ್ಯಾಪಾರಿಗಳ ಹಿತಕ್ಕೆ ಧಕ್ಕೆ ಮಾಡುತ್ತಿದೆ ಎಂದು ಸಾರ್ವಜನಿಕ ವಲಯದಲ್ಲಿ ಆಕ್ರೋಶ ವ್ಯಕ್ತವಾಗುತ್ತಿದೆ.
ಮುಂದಿನ ದಿನಗಳಲ್ಲಿಯಾದರೂ ಸಂಬಂಧಿಸಿದ ಇಲಾಖೆಗಳು ಸಾರ್ವಜನಿಕ ರಸ್ತೆ, ಸಂಚಾರದ ಸುಗಮತೆ ಹಾಗೂ ಸಾರ್ವಜನಿಕ ಶಾಂತಿಗೆ ಸಂಬಂಧಿಸಿದ ಸಮಸ್ಯೆಯಾಗಿ ಪರಿಣಮಿಸದಂತೆ ವ್ಯವಸ್ಥೆ ನಿರ್ಮಿಸಬೇಕಾಗಿದೆ ಎಂಬುದು ಸ್ಥಳೀಯರ ಆಗ್ರಹವಾಗಿದೆ.