(ಈ ಸಲಹೆ ದುಡ್ಡು ಮಾಡಿದವರಿಗಲ್ಲ; ದುಡ್ಡು ಮಾಡಬೇಕೆಂದುಕೊ0ಡವರಿಗೆ!)

ತಿಂಗಳಿಗೆ ರೂ. 20,000 ಗಳಿಸುವ ವ್ಯಕ್ತಿಯೂ ಉಳಿತಾಯ ಮಾಡಬಹುದು. ತಿಂಗಳಿಗೆ ರೂ. 2 ಲಕ್ಷ ಗಳಿಸುವ ವ್ಯಕ್ತಿಯೂ ಉಳಿತಾಯ ಮಾಡದೆ ಇರಬಹುದು. ವಿಷಯ ಇರುವುದು ಆದಾಯದಲ್ಲಲ್ಲ; ಹಣವನ್ನು ನಿರ್ವಹಿಸುವ ರೀತಿಯಲ್ಲಿ.

ಹಿಂದಿನ ಭಾಗದಲ್ಲಿ ಗಳಿಕೆಯ ವಿವಿಧ ಮೂಲಗಳ ಬಗ್ಗೆ ನೋಡಿದ್ದೇವೆ. ಈ ಭಾಗದಲ್ಲಿ ಗಳಿಸಿದ ಹಣದಲ್ಲಿ ಎಷ್ಟು ಉಳಿಸಬೇಕು? ಹೇಗೆ ಉಳಿಸಬೇಕು? ಎಲ್ಲಿ ಉಳಿಸಬೇಕು? ಎಷ್ಟು ಕಾಲ ಉಳಿಸಬೇಕು? ಮತ್ತು ಉಳಿತಾಯವನ್ನು ಯಾವಾಗ ಹೂಡಿಕೆಯಾಗಿ ಪರಿವರ್ತಿಸಬೇಕು? ಎಂಬುದನ್ನು ಸರಳವಾಗಿ ವಿಮರ್ಷಿಸೋಣ.

ಬಹಳ ಜನರ ಹಣಕಾಸಿನ ಕ್ರಮ ಹೀಗಿರುತ್ತದೆ ಉಳಿತಾಯ ವೆಂದರೆ ಖರ್ಚುಮಾಡಿ ನಂತರ ಉಳಿದ ಹಣಆಗಿರುತ್ತದೆ. ಆದರೆ ವಾಸ್ತವ ಆರೋಗ್ಯಕರ ಹಣಕಾಸಿನ ಕ್ರಮ ಆದಾಯ ನಂತರ ಉಳಿತಾಯ ಆಮೇಲೆ ಖರ್ಚು ಆಗಬೇಕು. 

1 ಹಣಕಾಸಿನ ಕ್ರಮ ಆದಾಯ - ಉಳಿತಾಯ ಅಗತ್ಯಖರ್ಚು ಉಳಿದರೆ ಇತರೆ ಖರ್ಚು

ತಿಂಗಳ ಆರಂಭದಲ್ಲಿಯೇ ಉಳಿತಾಯದ ಹಣವನ್ನು ಪ್ರತ್ಯೇಕಿಸಿದರೆ, ಉಳಿದ ಹಣದಲ್ಲಿ ಜೀವನ ನಡೆಸುವ ಅಭ್ಯಾಸ ಬರುತ್ತದೆ. ಭಾರತೀಯ ರಿಝರ್ವ್ ಬ್ಯಾಂಕ್ ಹಣಕಾಸು ಶಿಕ್ಷಣ ಮಾರ್ಗದರ್ಶಿಯಲ್ಲಿಯೂ ನಿಯಮಿತ ಉಳಿತಾಯವು ಅನಿರೀಕ್ಷಿತ ಖರ್ಚು, ಆದಾಯವಿಲ್ಲದ ಅವಧಿ, ಭವಿಷ್ಯದ ದೊಡ್ಡ ಅಗತ್ಯಗಳು ಮತ್ತು ವೃದ್ಧಾಪ್ಯಕ್ಕೆ ನೆರವಾಗುತ್ತದೆ ಎಂದು ವಿವರಿಸಿದೆ.

2. ಎಷ್ಟು ಆದಾಯ ಇರುವವರು ಎಷ್ಟು ಉಳಿತಾಯ ಮಾಡಬೇಕು?

ಇದಕ್ಕೆ ಎಲ್ಲರಿಗೂ ಒಂದೇ ಶೇಕಡಾವಾರು ನಿಯಮ ಇರಲು ಸಾಧ್ಯವಿಲ್ಲ. ಕುಟುಂಬದ ಗಾತ್ರ, ಸಾಲ, ಮನೆ ಬಾಡಿಗೆ, ಮಕ್ಕಳ ಶಿಕ್ಷಣ, ವೈದ್ಯಕೀಯ ವೆಚ್ಚ ಮುಂತಾದವುಗಳಿ0ದ ವ್ಯತ್ಯಾಸವಾಗುತ್ತದೆ.

ಆದರೆ ಆರಂಭಿಕ ಮಾರ್ಗದರ್ಶಿಯಾಗಿ ಈ ಮಾದರಿಯನ್ನು ಬಳಸಬಹುದು:

ಆದರೆ ಇಲ್ಲಿ 10% ಕನಿಷ್ಠ ಆರಂಭಿಕ ಗುರಿ, 15% ಉತ್ತಮ ಗುರಿ ಎಂದು ಪರಿಗಣಿಸಬಹುದು.

ಆದರೆ ಈಗಾಗಲೇ ದೊಡ್ಡ ಸಾಲ ಅಥವಾ ಕುಟುಂಬದ ತುರ್ತು ವೆಚ್ಚವಿದ್ದರೆ ಮೊದಲು ಆ ಪರಿಸ್ಥಿತಿಗೆ ಅನುಗುಣವಾಗಿ ಯೋಜನೆ ಮಾಡಬೇಕು.

ಒಂದು ಮುಖ್ಯ ನಿಯಮ:  ಆದಾಯ ಹೆಚ್ಚಾದಾಗ ಸಂಪೂರ್ಣ ಹೆಚ್ಚುವರಿ ಹಣವನ್ನು ಖರ್ಚು ಮಾಡುವ ಬದಲು, ಹೆಚ್ಚಳದ ಒಂದು ಭಾಗವನ್ನು ಉಳಿತಾಯಕ್ಕೆ ವರ್ಗಾಯಿಸುವ ಬದ್ಧತೆ ಬೆಳೆಸಿಕೊಳ್ಳಬೇಕು.

3. ಕಡಿಮೆ ಆದಾಯವಿದ್ದರೂ ಉಳಿತಾಯ ಸಾಧ್ಯವೇ?

ರೂ. 20,000 ಆದಾಯವಿದ್ದಾಗ ರೂ. 2,000 ಉಳಿಸುವುದು ಕಷ್ಟ ಎನಿಸಲೂ ಬಹುದು. ಆದರೆ ರೂ. 500ರಿಂದ ಆರಂಭಿಸಿದರೂ ಅದು ಉಳಿತಾಯದ ಅಭ್ಯಾಸವನ್ನು ರೂಪಿಸುತ್ತದೆ. ನಿಯಮಿತವಾಗಿ 400ರೂ. ಉಳಿತಾಯ ಮಾಡಿದರೂ ಕ್ರಮೇಣ ಈ ಹವ್ಯಾಸ ಪ್ರತಿವರ್ಷ ಹೆಚ್ಚುತ್ತದೆ. ಬದ್ಧತೆ ಮುಖ್ಯ. ಮೊತ್ತ ಚಿಕ್ಕದಾದರೂ ಅಭ್ಯಾಸ ದೊಡ್ಡದು. ಉಳಿತಾಯದ ಮೊದಲ ಗುರಿ ದೊಡ್ಡ ಮೊತ್ತವಲ್ಲ; ನಿಯಮಿತತೆಯನ್ನು ಬೆಳೆಸುವುದು ಎಂಬುದನ್ನು ಮನಗಾಣಬೇಕಿದೆ.

4. ಉಳಿತಾಯದ ಹಣವನ್ನು ಮೂರು ಭಾಗಗಳಾಗಿ ಯೋಚಿಸಿ

ಎಲ್ಲ ಹಣವನ್ನೂ ಒಂದೇ ಜಾಗದಲ್ಲಿ ಇಡುವ ಬದಲು ಅದರ ಉದ್ದೇಶವನ್ನು ಗುರುತಿಸುವುದು ಉತ್ತಮ.

1. ತುರ್ತು ನಿಧಿ : ಅನಾರೋಗ್ಯ, ಉದ್ಯೋಗ ನಷ್ಟ, ಮನೆಯ ತುರ್ತು ದುರಸ್ತಿ ಮುಂತಾದ ಸಂದರ್ಭಗಳಿಗೆ.

2. ಸಮೀಪದ ಗುರಿಗಳ ಹಣ  :  ಮಕ್ಕಳ ಶುಲ್ಕ, ವಿಮೆ, ವಾಹನ, ಮನೆ ದುರಸ್ತಿ, ಕೃಷಿ ವೆಚ್ಚ ಮುಂತಾದ ನಿರ್ದಿಷ್ಟ ಗುರಿಗಳಿಗೆ.

3. ದೀರ್ಘಾವಧಿಯ ಹಣ :  ಮಕ್ಕಳ ಭವಿಷ್ಯ, ನಿವೃತ್ತಿ, ಸಂಪತ್ತು ನಿರ್ಮಾಣ ಮುಂತಾದ ದೀರ್ಘಾವಧಿಯ ಗುರಿಗಳಿಗೆ.

ಎಚ್ಚರಿಕೆ : ತುರ್ತು ಹಣ ಮತ್ತು ದೀರ್ಘಾವಧಿಯ ಹೂಡಿಕೆಯ ಹಣ ಒಂದೇ ಆಗಬಾರದು.

5. ಉಳಿತಾಯವನ್ನು ಎಷ್ಟು ಕಾಲ ಮುಟ್ಟದೆ ಇರಬೇಕು ಎಂಬ ಮುಖ್ಯ ಸಂಗತಿ ಅರ್ಥಮಾಡಿಕೊಳ್ಳಬೇಕು.

ಹಣವನ್ನು ಹೆಚ್ಚು ಕಾಲ ಉಳಿಸುವುದೇ ಸಂಪತ್ತು ನಿರ್ಮಾಣ ಮಾಡುವುದಲ್ಲ; ಸರಿಯಾದ ಹಣವನ್ನು ಸರಿಯಾದ ಅವಧಿಗೆ ಇಡುವುದೇ ಮುಖ್ಯ.

6 ತಿಂಗಳಲ್ಲಿ ಬೇಕಾಗುವ ಹಣ :  ಹೆಚ್ಚು ಅಪಾಯದ ಹೂಡಿಕೆಗೆ ಬೇಡ.

5–10 ವರ್ಷಗಳ ನಂತರ ಬೇಕಾಗುವ ಹಣ :  ದೀರ್ಘಾವಧಿಯ ಹೂಡಿಕೆ ಆಯ್ಕೆಗಳನ್ನು ಪರಿಗಣಿಸಬಹುದು.

ಅಂದರೆ ಕಾಲಾವಧಿ ಹೆಚ್ಚಾದಂತೆ ಹೂಡಿಕೆಯ ಆಯ್ಕೆ ಬದಲಾಗಬಹುದು.

ಸೆಬಿಯ ಹೂಡಿಕೆ ಶಿಕ್ಷಣ ಮಾಹಿತಿಯಲ್ಲಿಯೂ ವಿವಿಧ ಹೂಡಿಕೆ ಉತ್ಪನ್ನಗಳಿಗೆ ವಿವಿಧ ಮಟ್ಟದ ಅಪಾಯವಿದ್ದು, ಹೂಡಿಕೆದಾರರು ತಮ್ಮ ಗುರಿ ಮತ್ತು ಅಪಾಯದ ಸಾಮರ್ಥ್ಯವನ್ನು ಪರಿಗಣಿಸಬೇಕು ಎಂದು ವಿವರಿಸಲಾಗಿದೆ.

6. ಹೆಚ್ಚು ಕಾಲ ಬಿಡುವುದರಿಂದ ಏನು ಲಾಭ?

ಚಕ್ರಬಡ್ಡಿಯನ್ನು ಪ್ರಪಂಚದ ಎಂಟನೇ ಅದ್ಭುತ ಎಂದು ವಿಜ್ಞಾನಿ ಐನ್‌ಸ್ಟೀನ್ ಬಣ್ಣಿಸಿದಂತೆ ಇಲ್ಲಿ ಚಕ್ರಬಡ್ಡಿಯ ಶಕ್ತಿ ಮುಖ್ಯವಾಗುತ್ತದೆ.  ಉದಾಹರಣೆಗೆ ತಿಂಗಳಿಗೆ ರೂ. 5,000 ಹೂಡಿಕೆ ಮಾಡುತ್ತಿದ್ದೇವೆ ಎಂದುಕೊಳ್ಳಿ. 12 ತಿಂಗಳಲ್ಲಿ ನಾವು ಹಾಕುವ ಹಣ: ರೂ. 60,000 10 ವರ್ಷಗಳಲ್ಲಿ ಸ್ವಂತವಾಗಿ ಹಾಕಿದ ಮೊತ್ತ: ರೂ. 6,00,000 ಇದಕ್ಕೆ ಹೂಡಿಕೆಯ ಮೇಲಿನ ಆದಾಯವೂ ಸೇರಿಕೊಂಡರೆ, ದೀರ್ಘಾವಧಿಯಲ್ಲಿ ಮೊತ್ತ ಇನ್ನಷ್ಟು ಬೆಳೆಯುವ ಸಾಧ್ಯತೆ ಇರುತ್ತದೆ.

ಆದರೆ ಇಲ್ಲಿ ಒಂದು ವಿಷಯ ಗಮನದಲ್ಲಿರಲಿ: ಯಾವುದೇ ಹೂಡಿಕೆಯಲ್ಲಿ ಭವಿಷ್ಯದ ಆದಾಯ ಖಚಿತವಲ್ಲ.

ಮಾರುಕಟ್ಟೆ ಆಧಾರಿತ ಹೂಡಿಕೆಗಳಲ್ಲಿ ಏರಿಳಿತವೂ ಇರುತ್ತದೆ. ಆದ್ದರಿಂದ ಕಾಲಾವಧಿ + ನಿಯಮಿತ ಹೂಡಿಕೆ + ಅಪಾಯದ ಅರಿವು ಮುಖ್ಯ.

7. ಹಣದುಬ್ಬರ ಎಂದರೇನು?

ಇ0ದು ರೂ. 100ಕ್ಕೆ ಸಿಗುವ ವಸ್ತು ಇದೇ ರೂ. 100ಕ್ಕೆ ಹಲವು ವರ್ಷಗಳ ನಂತರ ಸಿಗುತ್ತದೆ ಎಂದು ಹೇಳಲು ಸಾಧ್ಯವಿಲ್ಲ.

ವಸ್ತು ಮತ್ತು ಸೇವೆಗಳ ಬೆಲೆಗಳು ಕಾಲಕ್ರಮೇಣ ಏರಿದಾಗ, ಹಣದ ಖರೀದಿ ಸಾಮರ್ಥ್ಯ ಕಡಿಮೆಯಾಗುತ್ತದೆ. ಇದನ್ನೇ ಸರಳವಾಗಿ ಹಣದುಬ್ಬರದ ಪರಿಣಾಮ ಎಂದು ಅರ್ಥಮಾಡಿಕೊಳ್ಳಬಹುದು. ಆದ್ದರಿಂದ ರೂ. 1 ಲಕ್ಷವನ್ನು ವರ್ಷಗಳ ಕಾಲ ಯಾವುದೇ ಆದಾಯವಿಲ್ಲದೆ ಇಟ್ಟುಕೊಂಡರೆ, ಕಾಗದದ ಮೇಲೆ ರೂ. 1 ಲಕ್ಷವೇ ಇದ್ದರೂ ಅದರ ನೈಜ ಖರೀದಿ ಸಾಮರ್ಥ್ಯ ಕಡಿಮೆಯಾಗಬಹುದು.

8. ಹಣದುಬ್ಬರವನ್ನು ಎದುರಿಸುವ ಹೂಡಿಕೆ ಹೇಗೆ ಹುಡುಕಬೇಕು?

“ನನ್ನ ಹಣದ ಮೇಲೆ ಸಿಗುವ ತೆರಿಗೆ ನಂತರದ/ನೈಜ ಆದಾಯವು ದೀರ್ಘಾವಧಿಯಲ್ಲಿ ಹಣದುಬ್ಬರವನ್ನು ಮೀರಿಸುವ ಸಾಧ್ಯತೆ ಇದೆಯೇ?”  ಇದಕ್ಕೆ ಒಂದೇ ಹೂಡಿಕೆ ಎಲ್ಲರಿಗೂ ಉತ್ತರವಾಗುವುದಿಲ್ಲ.ಸಾಮಾನ್ಯವಾಗಿ: ಉಳಿತಾಯ ಖಾತೆ / ನಗದು / ಹೆಚ್ಚಿನ ದ್ರವ್ಯತೆ, ಆದರೆ ದೀರ್ಘಾವಧಿಯ ಸಂಪತ್ತು ನಿರ್ಮಾಣಕ್ಕೆ ಮಾತ್ರ ಅವಲಂಬಿಸುವುದು ಸೂಕ್ತವಲ್ಲ. ಎಫ್ ಡಿ /ಇತರೆ ಸ್ಥಿರ ಆದಾಯದ ಉತ್ಪನ್ನಗಳು  ನಿರ್ದಿಷ್ಟ ಆದಾಯ ಮತ್ತು ಕಡಿಮೆ ಮಾರುಕಟ್ಟೆ ಏರಿಳಿತ, ಆದರೆ ಹಣದುಬ್ಬರ ಮತ್ತು ತೆರಿಗೆ ಪರಿಣಾಮ ಪರಿಗಣಿಸಬೇಕು.

ಮ್ಯೂಚುವಲ್ ಫಂಡ್‌ಗಳು/ಈಕ್ವಿಟಿ  ದೀರ್ಘಾವಧಿಯಲ್ಲಿ ಬೆಳವಣಿಗೆಯ ಸಾಧ್ಯತೆ, ಆದರೆ ಮಾರುಕಟ್ಟೆ ಅಪಾಯ ಹೆಚ್ಚು. ಚಿನ್ನ ಪೋರ್ಟ್ಫೋಲಿಯೊ ವೈವಿಧ್ಯೀಕರಣಕ್ಕೆ ಬಳಸಬಹುದಾದ ಒಂದು ಆಸ್ತಿ ವರ್ಗ, ಆದರೆ ಅದನ್ನೇ ಸಂಪೂರ್ಣ ಹೂಡಿಕೆಯಾಗಿ ನೋಡುವ ಅಗತ್ಯವಿಲ್ಲ.

ಹೀಗಾಗಿ ಹಣದುಬ್ಬರವನ್ನು ಎದುರಿಸುವುದೆಂದರೆ ಒಂದೇ ಉತ್ಪನ್ನ ಹುಡುಕುವುದು ಅಲ್ಲ; ಗುರಿ, ಕಾಲಾವಧಿ ಮತ್ತು ಅಪಾಯಕ್ಕೆ ತಕ್ಕ ಆಸ್ತಿ ಹಂಚಿಕೆ ಮಾಡುವುದು. ಸೆಬಿಯ ಹೂಡಿಕೆದಾರರ ಸರ್ವೆಯಲ್ಲಿಯೂ ಹೂಡಿಕೆದಾರರು ವೈವಿಧ್ಯೀಕರಣ ಮತ್ತು ಅಪಾಯ ನಿರ್ವಹಣೆಯನ್ನು ಪ್ರಮುಖ ಕಾರಣಗಳಲ್ಲಿ ಒಂದಾಗಿ ಗುರುತಿಸಿರುವುದು ಕಂಡುಬರುತ್ತದೆ.

9. “ಉಳಿತಾಯ” ಮತ್ತು “ಹೂಡಿಕೆ” ಒಂದೇ ಅಲ್ಲ

ಇದನ್ನು ಪ್ರತಿಯೊಬ್ಬರೂ ನೆನಪಿಟ್ಟುಕೊಳ್ಳಬೇಕು.

ಉಳಿತಾಯ = ಹಣವನ್ನು ಭವಿಷ್ಯದ ಅಗತ್ಯಕ್ಕಾಗಿ ಬದಿಗಿಡುವುದು.

ಹೂಡಿಕೆ = ಆ ಹಣವನ್ನು ಬೆಳೆಯುವ ಉದ್ದೇಶದಿಂದ ನಿರ್ದಿಷ್ಟ ಆಸ್ತಿಯಲ್ಲಿ ಬಳಸುವುದು.

ಉಳಿತಾಯದ ಮೊದಲ ಹಂತದಲ್ಲಿ ಭದ್ರತೆ ಮತ್ತು ದ್ರವ್ಯತೆ ಮುಖ್ಯ.

ದೀರ್ಘಾವಧಿಯ ಹೂಡಿಕೆಯಲ್ಲಿ ಬೆಳವಣಿಗೆಯ ಸಾಧ್ಯತೆ ಮತ್ತು ಅಪಾಯ ಮುಖ್ಯ.

ಹೀಗಾಗಿ: ಮೊದಲು ತುರ್ತು ನಿಧಿ, ನಂತರ ಗುರಿ ಆಧಾರಿತ ಉಳಿತಾಯ ,  ನಂತರ ದೀರ್ಘಾವಧಿಯ ಹೂಡಿಕೆ.

10. ಒಂದು ಸರಳ ಮಾಸಿಕ ನಿಯಮ

ಪ್ರತಿ ತಿಂಗಳ ಆದಾಯ ಬಂದ ಕೂಡಲೇ:  10% — ಕಡ್ಡಾಯ ಉಳಿತಾಯ ಮೊದಲು ನಿಮ್ಮ ಭವಿಷ್ಯಕ್ಕಾಗಿ. 5% — ದೀರ್ಘಾವಧಿಯ ಹೂಡಿಕೆ  ನಿಮ್ಮ ಗುರಿ ಮತ್ತು ಅಪಾಯದ ಸಾಮರ್ಥ್ಯಕ್ಕೆ ಅನುಗುಣವಾಗಿ.  ಉಳಿದ 85% — ಜೀವನ ಮತ್ತು ಇತರೆ ಅಗತ್ಯಗಳು  ಇದು ಎಲ್ಲರಿಗೂ ಕಡ್ಡಾಯ ನಿಯಮವಲ್ಲ.

ಸಾಲದ ಪ್ರಮಾಣ ಹೆಚ್ಚಿದ್ದರೆ ಅಥವಾ ಆದಾಯ ಕಡಿಮೆಯಿದ್ದರೆ ಮೊದಲು 5%ರಿಂದ ಆರಂಭಿಸಿ, ಪರಿಸ್ಥಿತಿ ಸುಧಾರಿಸಿದಂತೆ 10%–15%ಕ್ಕೆ ಹೆಚ್ಚಿಸಬಹುದು.  ಮುಖ್ಯವಾದದ್ದು ಉಳಿತಾಯ“ಎಷ್ಟು?” ಎನ್ನುವುದಕ್ಕಿಂತ “ನಿಯಮಿತವಾಗಿ ಎಷ್ಟು?” ಎಂಬುದು.

11. ಉಳಿತಾಯ ಹೆಚ್ಚಿಸುವ ಐದು ಸರಳ ಮಾರ್ಗಗಳು

1. ಸಂಬಳ ಬಂದ ದಿನವೇ ಉಳಿತಾಯ ಮಾಡಿ.

2. ಅನಗತ್ಯ ಇ ಎಂ ಐಗಳನ್ನು ತಪ್ಪಿಸಿ.

3. ಸಣ್ಣ-ಸಣ್ಣ ದಿನನಿತ್ಯದ ಖರ್ಚುಗಳನ್ನು ಗಮನಿಸಿ.

4. ಆದಾಯ ಹೆಚ್ಚಾದಾಗ ಉಳಿತಾಯದ ಮೊತ್ತವನ್ನೂ ಹೆಚ್ಚಿಸಿ.

5. ಉಳಿತಾಯದ ಹಣವನ್ನು ಗುರಿಯಿಲ್ಲದೆ ಖಾತೆಯಲ್ಲಿ ಬಿಟ್ಟುಬಿಡದೆ, ಅದರ ಉದ್ದೇಶಕ್ಕೆ ತಕ್ಕ ಸಾಧನವನ್ನು ಆಯ್ಕೆ ಮಾಡಿ.

ಕೊನೆಯ ಮಾತು

ಹಣ ಗಳಿಸುವುದು ಜೀವನದ ಒಂದು ಹಂತ.

ಹಣ ಉಳಿಸುವುದು ಶಿಸ್ತು.

ಉಳಿಸಿದ ಹಣವನ್ನು ಸರಿಯಾಗಿ ಬಳಸುವುದು ಜಾಣ್ಮೆ.

ಆ ಹಣವನ್ನು ದೀರ್ಘಾವಧಿಯಲ್ಲಿ ಬೆಳೆಸುವುದು ಸಂಪತ್ತು ನಿರ್ಮಾಣ.

(ಮುಂದಿನ ದಿನಗಳಲ್ಲಿ ಉಳಿತಾಯಕ್ಕೇ ಸಂಬ0ಧಿಸಿದ0
ತೆ ಇತರ ವಿಷಯಗಳನ್ನು) ಮುಂದುವರೆಸಲಾಗುವುದು