ಮ್ಯೂಚುವಲ್ ಫಂಡ್‌ನಲ್ಲಿ ದೀರ್ಘಾವಧಿಯವರೆಗೆ ಶಿಸ್ತಿನಿಂದ ಹೂಡಿಕೆ ಮಾಡಿದರೆ ಸಣ್ಣ ಮೊತ್ತವೂ ಬೃಹತ್ ನಿಧಿಯಾಗಿ ಬೆಳೆಯುತ್ತದೆ ಎಂಬುದಕ್ಕೆ ಎಚ್‌ಡಿಎಫ್‌ಸಿ (HDFC) ಸಂಸ್ಥೆಯ ಎರಡು ಪ್ರಮುಖ ಫಂಡ್‌ಗಳು ಅತ್ಯುತ್ತಮ ಉದಾಹರಣೆಯಾಗಿವೆ. ಇತ್ತೀಚೆಗೆ 'ದಿ ಎಕನಾಮಿಕ್ಸ್ ಟೈಮ್ಸ್' ವರದಿ ಮಾಡಿದಂತೆ, ಕಳೆದ 29-30 ವರ್ಷಗಳಲ್ಲಿ ಈ ಫಂಡ್‌ಗಳು ತಂದುಕೊಟ್ಟಿರುವ ರಿಟರ್ನ್ ನಿರೀಕ್ಷೆಗೂ ಮೀರಿದ್ದಾಗಿದೆ.

ಮಾರ್ಚ್ 1996 ರಲ್ಲಿ ಪ್ರಾರಂಭವಾದ ಎಚ್‌ಡಿಎಫ್‌ಸಿ ಫ್ಲೆಕ್ಸಿ ಕ್ಯಾಪ್ ಫಂಡ್ (HDFC Flexi Cap Fund) ನಲ್ಲಿ ಆರಂಭದಿಂದ ಪ್ರತಿ ತಿಂಗಳು ₹10,000 ರಂತೆ 343 ತಿಂಗಳುಗಳಲ್ಲಿ ಒಟ್ಟು ₹34.30 ಲಕ್ಷ ಹೂಡಿಕೆ ಮಾಡಿದವರಿಗೆ, ಶೇಕಡಾ 19.94 ರಷ್ಟು ವಾರ್ಷಿಕ ಸರಾಸರಿ ರಿಟರ್ನ್ (XIRR) ನೊಂದಿಗೆ ಇಂದು ಆ ಮೊತ್ತ ಬರೋಬ್ಬರಿ ₹21.37 ಕೋಟಿಯಾಗಿ ಬೆಳೆದು ನಿಂತಿದೆ.

ಅದೇ ರೀತಿ, ಆದಾಯ ತೆರಿಗೆ ಉಳಿತಾಯಕ್ಕಾಗಿ ಜನವರಿ 1995 ರಲ್ಲಿ ಪ್ರಾರಂಭವಾದ ಎಚ್‌ಡಿಎಫ್‌ಸಿ ಇಎಲ್‌ಎಸ್ಎಸ್ ಟ್ಯಾಕ್ಸ್ ಸೇವರ್ ಫಂಡ್ (HDFC ELSS Tax Saver Fund) ನಲ್ಲಿ ಪ್ರತಿ ತಿಂಗಳು ₹10,000 ರಂತೆ 357 ತಿಂಗಳುಗಳಲ್ಲಿ ಒಟ್ಟು ₹35.70 ಲಕ್ಷ ಹೂಡಿಕೆ ಮಾಡಿದವರ ನಿಧಿ, ಶೇಕಡಾ 20.70 ರಷ್ಟು ವಾರ್ಷಿಕ ಸರಾಸರಿ ರಿಟರ್ನ್‌ನೊಂದಿಗೆ ಇವತ್ತು ಸುಮಾರು ₹19.94 ಕೋಟಿ ತಲುಪಿದೆ.

ಪ್ರಸ್ತುತ ಮಾರುಕಟ್ಟೆ ಇಳಿದಿರುವ ಸನ್ನಿವೇಶಕ್ಕೂ ಇದು ಖಂಡಿತವಾಗಿಯೂ ಅನ್ವಯಿಸುತ್ತದೆ. ಕಳೆದ 30 ವರ್ಷಗಳಲ್ಲಿ ಶೇರು ಮಾರುಕಟ್ಟೆ 1999, 2008 ಮತ್ತು 2020 ರಂತಹ ಹಲವು ದೊಡ್ಡ ಕುಸಿತಗಳನ್ನು ಕಂಡಿದೆ. ಮಾರುಕಟ್ಟೆ ಇಳಿದಾಗ ಹೂಡಿಕೆ ಮಾಡುವುದರಿಂದ ಕಮ್ಮಿ ಬೆಲೆಗೆ ಹೆಚ್ಚಿನ ಯೂನಿಟ್‌ಗಳು ಸಿಗುತ್ತವೆ, ನಂತರ ಮಾರುಕಟ್ಟೆ ಚೇತರಿಸಿಕೊಂಡಾಗ ಅದೇ ಯೂನಿಟ್‌ಗಳು ಬೃಹತ್ ಲಾಭ ತಂದುಕೊಡುತ್ತವೆ. ದೀರ್ಘಾವಧಿಯ ಶಿಸ್ತು ಮತ್ತು ಬಡ್ಡಿಯ ಮೇಲಿನ ಬಡ್ಡಿ ಸೇರುವ ಚಕ್ರಬಡ್ಡಿಯ ಶಕ್ತಿಯೇ ಈ ಸಣ್ಣ ಮೊತ್ತ ಕೋಟಿಗಳಾಗಿ ಬೆಳೆಯಲು ಪ್ರಮುಖ ಕಾರಣ ಎಂದು ಎಕನಾಮಿಕ್ಸ್‌ ಟೈಮ್ಸ್ನ ವರದಿ ಹೇಳಿದ್ದು ಸರಳೀಕರೀಸಿ ಪ್ರಕಟಿಸಲಾಗಿದೆ.